پاکستانیوں کو مبارک

آج کا دن ہر اس شخص کو بہت مبارک جو اس ملک کو غلطی سمجھ کہ اسی میں رہ کہ "غلطی کو سدھارنا چاہتے ہیں-یقین مانیے یہ دن آپ ہی جیسوں کے سینوں پہ مونگ دلنے کو آتا ہے- سو مبارک باد لیجیے- آزادی کی مبارک باد- ارے وہی بولنے کی کہنے کی آزادی بیف کھانے کی تنقید کرنے کی آزادی- شادیوں طلاقوں کی آزادی-
 آج کا دن ہر اس شخص کو بھی بہت مبارک جس کو اس ملک نے دیا ہی کچھ نہیں ہے- یہ دن ہر کرپٹ سیاستدان کے حامی کو بہت مبارک- جرنیلوں کے خم ابرو پر جان دینے والوں کو بھی یہ دن مبارک- ڈی ایچ کیوز میں پلاٹ بنانے بنا کر بیچنے والوں کو بھی یہ دن بہت مبارک-سڑکوں ٹرینوں بسوں میں کمیشن کھانے والوں کو مبارکباد- تعلیم کی صحت کی پرائیویٹ لیمیٹڈ کمپنیز کھول کے اس ملک کے حالات پر بے لاگ تبصروں والوں کو خصوصی مبارکباد-
 سیسلین مافیا کہلوانے اس پر مٹھائیاں کھانے والوں اس پر تڑفنے والوں دونوں کو یہ دن دل کی اتھاہ گہرائیوں سے مبارک- سارے "نیوٹرلز کو آج کا دن مبارک- عصبیت کے نام پر اپنی اپنی دوکانیں کھولنے والوں کو مبارک نسل رنگ زبان آہنگ علاقائیت بیچ کر پاکستان کھانے والوں کوآزادی مبارک- اپنے بچوں کو "باہر سیٹ کرنے کے لیے گدھوں کی طرح کام کرتے گدھوں یہ ملک اس کی آزادی مبارک- ماؤں بہنوں بیٹیوں کو اپنی جھوٹی انا بے غیرتی والی غیرت کی بھینٹ چڑھا کر مشرقی روایات قرار دینے والوں کو آج کا دن اس ملک میں گزارنے پر مبارکباد- لفظوں کی حرمت قلم کی عزت بیچ کھانے والوں کو آج کے دن کی بہت مبارکباد
 خدا پر قبضہ جمانے کی کوشش کرنے والوں کو، اس کے احکامات اپنی مرضی سے بتانے والوں کو اس مملکت خداداد میں اپنی شتر بے مہار آزادی کی بدولت آج کا دن مبارک- ظلم کے بدلے ظلم کا انصاف کرنے والے سارے پنچائیتیوں کو مبارک- کھیل میں جوا ڈیوٹی میں ڈنڈی امتحان میں پرچی پر بھروسے والوں کو اس دن کی ڈھیروں مبارکباد- ڈیوٹی سے چھٹی کر کے ٹیوشن سینٹر چلانے والے استادوں کو- دودھ میں نہر کا شفاف پانی ملانے والے گوالے کو- مرچوں میں اینٹ کا برادا ڈالنے والے کو- کمٹمنٹس کر کے بھاگ جانے والوں کو- اوروں کی تخقیر کرنے والوں اور مجھ سمیت ہر طنزیہ "دانشور کو یہ دن مبارک- کیوں بھلا؟ کیوں کہ یہ دن ہے تو ہم سب کی دوکانیں چل رہی ہیں-
یہ آزادی ہے تو ہم سب اپنا اپنا چورن بیچ رہے ہیں- اور یہ پاکستان ہے تو ہمارے حرفوں کو پڑھنے والے ہیں اور اس لیے کیونکہ یہ ہم سب کا پاکستان ہے- اچھا برا بھلا ہم نے ہی سوچنا ہے اس کے متعلق- اور اسے ہم ہی نے اون کرنا ہے.
 سو ہیپی انڈیپینڈنس ڈے دوستوں-
 کیونکہ تیرا پاکستان ہے یہ میرا پاکستان ہے.